|

Doorashada Ururka Guud ee Ardeeyda Soomaaliyeed ee Suudaan oo Maanta Khartoum ka Dhacday

Khartoum – JLN: Doorashada Golaha Fulinta iyo Sharcidajinta ee Ururka Guud ee Ardeeyda Soomaaliyeed ee dalka Suudaan, ayaa maanta ka dhacday magaalada Khartoum ee xarunta dalka Suudaan, waxaana lagu qabtay Daarta Shirarka Caalamiga ah ee Ribaad Alwaddani.

Kummanaan ah taageerayaasha murashaxiinta u lollamayey xilka guddoomiyaha Ururka ayaa madasha codbixinta buuxdhaafiyey; waxaana goobta codeynta gaafwareegayey ciidamada Booliska Suudaan oo sugayey amaanka goobta; ayadoo codbixiyayaashuna loo siideynayey raac-raac si ay u doortaan murashixiintooda.

Inkastoo ay doorashadi maanta u dhacday si wanaagsan, haddanna waxaa la dareemayey sida ay qabyaaladda u habcisay guud ahaan bulshada Soomaaliyeed gaar ahaanna aqoonyahannada Suudaan ku dhaqan ee jaamacadaha ka dhigta, waxaana laysku dooranayey qaab ollog la ah halbeegga 4.5 ee dalka Soomaaliya lagu maamulo.

Natiijada doorashada ayaa lagu wadaa in 48 saacadood ee inagu soo socda gudahooda lagu dhawaaqo kaddibna waxaa dhici doonta xaflad xilwareejin ah oo dhax mari doonta Maamulki xilka horay u hayey iyo kan cusub.

Jubbalandnews.com

 

 

Comments are closed